विदर्भ न्यूज मराठी प्रतिनिधी उमरखेड (यवतमाळ) :
कष्ट, जिद्द आणि प्रामाणिक प्रयत्नांच्या जोरावर ग्रामीण भागातील विद्यार्थीही यशाची उत्तुंग शिखरे गाठू शकतात, हे अंबाळी येथील कु. कांचन धुमाळे हिने सिद्ध करून दाखवले आहे. उमरखेड तालुक्यातील अंबाळी येथील मा. कंडक्टर दिगंबर धुमाळे यांची सुपुत्री डॉ. कांचन धुमाळे हिने आंबेजोगाई येथील स्वामी रामानंद तीर्थ ग्रामीण वैद्यकीय महाविद्यालयातून एमबीबीएस पदवी संपादन करून वैद्यकीय क्षेत्रात उल्लेखनीय यश मिळवले आहे.
कांचनचे यश विशेष कौतुकास्पद ठरत आहे. कारण तिने कोणत्याही खासगी ट्युशनचा आधार न घेता केवळ घरच्या घरी सातत्यपूर्ण अभ्यास, मेहनत आणि चिकाटीच्या जोरावर हा टप्पा गाठला आहे. तिच्या या यशामुळे धुमाळे कुटुंबासह अंबाळी गावाचा नावलौकिक वाढला असून परिसरात अभिमानाची भावना व्यक्त होत आहे.
वैद्यकीय पदवी प्राप्त करणे ही केवळ शैक्षणिक उपलब्धी नसून समाजसेवेच्या पवित्र व्रताची सुरुवात आहे. रुग्णसेवा, करुणा आणि निष्ठेच्या बळावर डॉ. कांचन धुमाळे आगामी काळात वैद्यकीय क्षेत्रात उल्लेखनीय कार्य करेल, असा विश्वास ग्रामस्थांकडून व्यक्त होत आहे.
तिच्या या यशाबद्दल अंबाळी परिसरातील नागरिक, मान्यवर तसेच मित्रपरिवाराकडून तिच्यावर अभिनंदनाचा वर्षाव होत असून, पुढील उच्च शिक्षणासाठी आणि उज्ज्वल भविष्यासाठी शुभेच्छा दिल्या जात आहेत.