बसस्थानक प्रवेशद्वारावरच ‘भल्ला’मोठा खड्डा; निकृष्ट कामाचा फटका, प्रवाशांचे हाल
विदर्भ न्यूज मराठी पुसद प्रतिनिधी
शहरातील बसस्थानक आगारात प्रवेश करणाऱ्या मुख्य गेटवरच मोठा खड्डा पडल्याने एसटी बसचालकांना दररोज जीव मुठीत धरून बस चालवावी लागत आहे. या खड्ड्यामुळे बसचे नुकसान होण्याबरोबरच प्रवाशांच्या सुरक्षिततेचाही प्रश्न निर्माण झाला असून प्रशासनाच्या कामकाजावर संताप व्यक्त होत आहे.
सीगल कंपनीमार्फत अवघ्या एका वर्षांपूर्वीच या ठिकाणी सिमेंट रोडचे काम करण्यात आले होते. मात्र अल्पावधीतच रस्त्याची ही दुरवस्था झाल्याने कामाच्या दर्जाबाबत गंभीर प्रश्न उपस्थित झाले आहेत. संबंधित सा बा विभाग व तत्कालीन कार्यकारी अभियंता यांनी कामावर वेळोवेळी देखरेख न ठेवल्यामुळेच हे निकृष्ट काम झाल्याची चर्चा नागरिकांमध्ये रंगू लागली आहे.
दररोज हजारो बस या मार्गाने ये-जा करतात. गेटवरच पडलेल्या या मोठ्या खड्ड्यामुळे बस चालकांना वाहन हळू करावे लागते, त्यामुळे वाहतूक कोंडी निर्माण होते. अनेकदा बसला धक्के बसून प्रवाशांना त्रास सहन करावा लागत असल्याच्या तक्रारीही पुढे येत आहेत.
प्रशासनाने या गंभीर समस्येकडे तातडीने लक्ष देऊन संबंधितांवर कारवाई करावी व खड्ड्याची दुरुस्ती करावी, अशी मागणी नागरिकांकडून होत आहे.