कैलास टेकडीवर जाणाऱ्या भाविकांचा ऑटो पलटी – 8 जखमी
माहूर (प्रतिनिधी – अंबादास मुकटे) : माहूर गडावरील कैलास टेकडीच्या दर्शनासाठी जात असलेल्या भाविकांच्या ऑटोला अपघात होऊन चालकासह आठ जण गंभीर जखमी झाल्याची घटना आज दि. 17 रोजी सकाळी सुमारे 8.30 वाजता घडली.
मिळालेल्या माहितीनुसार, हिंगोली जिल्ह्यातील कळमनुरी तालुक्यातील येळेगाव तुकाराम येथील भाविक ऑटो क्रमांक MH 37 G 4726 ने श्री कैलास टेकडीच्या दर्शनासाठी निघाले होते. श्री दत्त शिखर घाटातून काळापाणी तलाव मार्गे जात असताना घाटातील तिसऱ्या अत्यंत धोकादायक वळणावर चालकाचा ताबा सुटल्याने ऑटो पलटी झाला.
या भीषण अपघातात चालक गजानन नागरे (वय 32) यांच्यासह अश्विनी दुर्गे (32), लक्ष्मीबाई काळे (42), अर्णव दुर्गे (9), प्रशांत काळे (12), मीना काळे (35), सपना काळे (36) व दत्ता काळे (38) हे गंभीर जखमी झाले. काही भाविक ऑटोमधून बाहेर फेकले गेले, तर काही जण ऑटोखाली दबले गेले होते. घटनेनंतर रस्त्यावरून जाणाऱ्या नागरिकांनी तात्काळ माहिती दिल्यानंतर श्री रेणुका देवी संस्थानच्या ॲम्बुलन्स चालक विनोद जाधव व स्वच्छता कर्मचारी वैभव दळवी यांनी घटनास्थळी धाव घेत जखमींना बाहेर काढले. त्यानंतर सर्व जखमींना माहूर येथील ग्रामीण रुग्णालयात दाखल करण्यात आले.
येथे वैद्यकीय अधीक्षक डॉ. बिपिन बाबळे व त्यांच्या पथकाने प्राथमिक उपचार केले. जखमींची प्रकृती गंभीर असल्याने त्यांना पुढील उपचारासाठी यवतमाळ येथे हलविण्यात आले आहे.दरम्यान, या घटनेची नोंद पोलिसांनी घेतली असून पुढील तपास सुरू आहे.